Oberturaren ondoren, koruak Veronako Montesco eta Capuleto familia nobleen arteko borroka kontatuko du Sarreran, eta lehenengoko Romeoren eta bigarreneko Julietaren arteko maitasunaz hitz egingo du.  

Lehen ekitaldiaren hasieran, Capuletoen jauregian dantzaldia egiten ari dira. Bi noble gazte, Teobaldo eta Paris, berriketan ari dira, eta Julieta, Capuleto jaunaren alaba, Parisen emaztegai bihurtuko dela jakingo dugu. Familiako burua sartu, eta alaba dantzaldian bildutakoei aurkeztuko die. Dantzariek alde egin eta gero Montesco familiako kide batzuk, mozorroturik bertaratuak, bakarrik geratuko dira. Haien artean, Romeo eta bere lagun Mercucio. Lehenak arriskua datorrelako susmoa du, eta adiskideak iseka egingo dio esanez Rosalina ez delako jauregira etorri dagoela triste, baina dantzaldian dauden edertasunak ikusi bezain laster ahaztuko duela. Orduan, Romeok Julieta ikusi, eta berehala geratuko da harekin liluratuta. Mercucioren esanetan, badirudi Romeok bere Rosalina ahaztu duela.

Julietaren inude Gertrudisek Parisekin ezkontzeko konpromisoa aipatzen dionean neska gazteari, hark gaztetasunaz ahalik eta denbora gehien gozatu nahi duela esango dio. Geroago, Romeo eta Julieta aurreneko aldiz egongo dira elkarrekin. Romeok Julietaren edertasuna lausengatuko du, baina neskak aise baztertuko ditu haren hitz politak. Romeok nor den galdetuta, Julietak Capuleto jaunaren alaba dela erantzungo dio, gizonaren atsekaberako. Teobaldok dantzara itzultzeko eskatuko dio neskari, norekin mintzatzen ari den galdetzeaz gain (Teobaldo hurbiltzen ari dela ikusita, Romeok mozorroa jantzi du berriro bere nortasuna ezkutatzeko), baina hark ez dakiela erantzungo dio. Romeok adeitasun garratzez agurtuko du Teobaldo eta honek, haren ahotsa ezagututa, mendeku-mehatxuak botako ditu ahapeka.

Orain, Julietak badaki nor den Romeo, eta ikaratuta dago bere familiaren etsai batekin maitemindu delako. Romeo berriz agertzen denean, Teobaldok eta Parisek agurtu, eta familia batekoek eta bestekoek etsaitasunezko hitzak esango dizkiote elkarri; Capuleto jauna, berriz, jai-giroari eusten saiatuko da. 

Bigarren ekitaldia Julietaren lorategian hasiko da. Lehenik, Romeo agertuko da, eta handik gutxira Julieta, balkoian, Montesco familiako gizon bat  maite duelako nahigabetuta. Romeok nor den jakinarazi eta maite duela aitortuko dio, baina Julietak, norbait datorrela entzutean, ezkutatzeko eskatuko dio. Capuletoen morroi-talde bat da, hor inguruan ikusi duten Montescoen mutil baten bila. Lorategia miatu ostean, morroiak Gertrudisekin txantxetan ari dira, galdetuz bera ote den Montesco batek hainbesteko ausardia erakutsi izanaren arrazoia. Alde egiten dutenean, Gertrudisek etxean sartzeko konbentzituko du Julieta. Hasieran jaramon egingo badio ere, gero lorategira itzuliko da, non maitaleek beren maitasun-duoarekin jarraitu eta biharamunera arte agurtuko duten elkar.

Hirugarren ekitaldiko lehen eszenan, anaia Lorenzo fraide frantziskotarraren ziega ageri da. Ekitaldiarte baten ondoren, Romeo sartu, eta Julietarekin ezkon dezala eskatuko dio. Ezkontza bitartean, Gertrudis kanpoan geratuko da ate ondoan zelatan. Bigarren eszenan, ekintza Capuletoen jauregian gertatuko da. Romeoren morroia bere nagusiaren bila dabil. Zenbait Capuleto, Gregorio buru dutela, jauregitik irtetean morroiak barre egingo die. Mercucio etorri eta Teobaldorekin borrokan hasiko da, baina Romeok banandu egingo ditu. Teobaldo irainka ari zaion arren, Romeok ez dio aurre egingo, Julietaren senidea dela gogoan, eta elkar gorrotatzeko garaia amaitu dela esango du. Mercuciok, Romeo borroka egiteari uko egiten ari zaiolako asaldatuta, Teobaldori erasoko dio. Mercucio lurrera erori ondoren, Romeok, zeharo amorratuta, Teobaldo hilko du. Capuleto jauna sartu eta Romeo konturatuko da, saminduta, Teobaldo hil izanak Julietaren gorrotoa ekar diezaiokeela. Hil aurretik, Teobaldok bere azken nahia jakinaraziko dio Capuleto jaunari, besteek entzun ezin izango dutena.

Capuletok Dukearengana joko du, justizia egin dezan. Romeok dio, bere burua justifikatzeko, aurrena Teobaldok hil duela Mercucio. Dukeak familia biei errieta egin, eta Romeo erbestera bidaliko du. Ekitaldiaren amaieran, Romeok Julieta berriz ikusteko gogo irmoa adieraziko du; Capuletoek, aldiz, Dukearen bake-eskaerari muzin eginda, Montescoen aurkako mendekua aldarrikatuko dute.
Laugarren ekitaldia Julietaren logelan hasiko da. Romeori Teobaldo hil izana barkatu eta berriz aitortuko dio maite duela. Egunsentian, alde egin behar duela esango dio. Romeo balkoian behera joango da, eta Julieta bertan geratuko da gizonak onik ihes egin dezan errezatzen.  Ondoren, Gertrudisek, oso aztoratuta, aita datorrela jakinaraziko dio. Anaia Lorenzorekin batera iritsi, eta Paris kondearekin berehala ezkondu behar duela esango dio alabari: horixe zen Teobaldok hil aurretik adierazitako nahia. Capuleto jauna ezkontzako gonbidatuei ongietorria egitera joan eta gero Julietak laguntzeko erregutuko dio anaia Lorenzori. Fraideak likido batez betetako anpoila bat eman eta azalduko dio edaten duenean lo sakon-sakonean geratuko dela, hain sakonean, ezen denek hilda dagoela uste izango duten, nahiz eta egoera horretan egun bakar batez egongo den.

Anaia Lorenzok hitzemango dio esnatzen denean ondoan izango duela eta Romeorekin ihes egiten lagunduko diola. Julietak edabea edango du. Capuleto jauna Parisekin, Gertrudisekin eta bere segizioarekin itzuliko da. Emaztegaia izanik bizi izango dituen gozamenez hitz egingo dio. Julieta, bere eztei-ohea hilobia izango dela esan ondoren, lurrera eroriko da zeharo zorabiatuta.

Bosgarren ekitaldiko agertokia Capuletoen familia-panteoia da. Orkestra-interludio batek Julietaren ametsa deskribatuko ostean, Romeo sartuko da, Julieta hilda dagoela jakitun. Haren edertasuna miretsi, eldarnio betean maitea besarkatu eta, azkenik, pozoi bat edango du. Horren eraginaren ondorioz hiltzen ari denean, Julieta esnatzen hasia dela ikusiko du, harrituta. Hark bere izena dioenean, Romeok, estasiatuta, ihes egin dezatela eskatuko dio. Baina dagoeneko ezin du pozoiaren eragina ekidin, beraz, bere bizitza amaitzen ari dela aitortuko du. Julietak, larrituta, pozoi bat eskatuko du berarentzat, baina ez dagoenez, labanaz hilko du bere burua. Maitale biak heriotzan elkartu dira azkenean.