Información:

Sinopsia

Enrike VIII.a Jane Seymourrekin maiteminduta dago, baina, harekin ezkondu ahal izateko, bere bigarren emazte Anne Boleynekin duen lotura hautsi beharra dauka. Anne prest dago bere logelan Percyrekin biltzeko; gizonak aspalditik miresten du erregina, eta harekin maiteminduta dago, baina erregeak deserritik itzul dadin deitu du. Smeton morroiak, isilpean Annerekin maiteminduta dagoenak, elkarrizketa hori entzungo du, kasualitatez. Annek ez ditu onartuko Percyren maitasun-proposamenak, eta gizonak, desesperaturik, bere burua hil nahiko du. Erregina arriskuan dagoelakoan, Smeton bere ezkutalekutik irtengo da, hura babesteko, eta, orduantxe, erregea emaztearen logelan sartuko da. Enrikek, espero zuen aukera baliatuta, denak atxilotzeko agindua emango du, traizio egin diotela esanez.

Bigarren ekitaldian, Janek esango dio Anneri onena duela errudun dela aitortzea, horrela baino ezingo duelako salbatu bizia. Gero, aitortuko dio bera dela erregearen maitalea, eta barkamena erregutuko dio. Erreginak, hunkiturik, barkatu egingo dio. Epaimahaiaren aurrean, Smetonek aitortuko du Anneren maitalea dela, horrela erregina salbatu ahal izango duelakoan. Percyk ere erregina maite duela aitortuko dio Enrikeri, baina, halere, Anneren patua idatzita dago: heriotzara kondenatuko dute, bere neba Lord Rochefort, Smeton eta Percyrekin batera. Londresko Dorrean, Percyk eta Lord Rochefortek mespretxuz egingo diote uko erregearen indultuari, eta Anne hiltzeko prestatuko da, Jaunari Henry eta Janerentzako barkamena erregutu bitartean. Urrunean, alaitasun- eta ospakizun-hotsak entzuten dira: erregea Jane Seymourrekin ezkondu berri da.