Prosdocimo poetak, bere hurrengo lana idazteko gai apropos baten bila dabilela, Napolesko kanpoaldean, ijito-talde batekin egingo du topo. Geroniori etorkizuna igarri ostean, bere emazte Fiorilla apetatsua noiz zentzatuko den jakin nahi baitu, Zaidak, ijito-talde horretako emakume batek, Albazarren laguntzaz Selim printze maitearengandik ihes egin behar izan zuela kontatuko dio Prosdocimori. Izan ere, haremeko gainerako emakumeek sinetsarazi zioten Selimi Zaida ez zela leiala, eta printzea jeloskor jokatzen hasi zen. Poetak jakinaraziko dio printze turkiar bar ailegatzeko zorian dagoela eta, agian, neskaren alde mintzatu ahal izango dela. Fiorilla lagun batzuekin batera pasieran ibiltzetik datorrenean, printzearen itsasontzia heldu eta lehorreratu egingo da. Fiorillaren edertasunak harri eta zur utziko du printzea, eta berehala gortea egiten hasiko zaio. Prosdocimok Narciso ezagutuko du, Fiorillaren zerbitzura dagoen zalduna, eta hura ere andrearen izaera aldakorraz kexatuko da. Horrez gain, kontatuko dio Fiorillak kafea hartzera gonbidatu duela printzea, zeina, benetan, Zaidak maite duen Selim turkiarra den. Prosdocimo pozik dago katramila horrek guztiak bere drama komikoa idazteko eskain diezazkiokeen aukerak gogoan. Geronioren etxean, Fiorilla maite-jolasetan dabil Selimekin, lotsarik gabe. Geronio datorrenean, printzeari begirunea erakusteko, haren arropak musukatu beharko ditu, eta jokabide horrek harrituta utziko du Narciso. Selimek alde egingo du, Fiorillarekin arratsaldean itsaso ondoan elkar ikusteko adostu ostean. Geroniok gertatutakoaren berri emango dio Prosdocimori, eta poetak atsegin handiz entzungo ditu, bere draman baliatzeko inspirazio-iturri ederra aurkitu duelakoan. Ondoren, Geroniok eta Fiorillak eztabaida bizia izango dute, eta emakumeak harro aldarrikatuko du nahi beste maitale izateko eta gogoak ematen diona egiteko askatasuna. Selim itsasertzean dagoela, Fiorillaren zain, Zaida agertuko da. Printzeak eta ijitoak batak bestea ezagutu eta elkar besarkatuko dute, baina, une horretan, Fiorilla iritsiko da, atzetik, emakumea konturatu gabe, Geronio eta Narciso segika dituela. Fiorilla Zaidari oldartuko zaio, eta gizonak alferrik saiatuko dira bi andreen arteko bakea lortzen. Egoera ikusita, Prosdocimo pozarren dago.

Bigarren ekitaldia ostatu baten barruan hasiko da. Poetaren bitartez, Fiorilla eta Selim bertan elkartuko direla jakingo du Geroniok. Printzea heldu, eta emaztea sal diezaion proposatuko dio Geroniori; izan ere, Selimen herrialdean ohikoa da. Geroniok ezezko biribila emango dio, eta gizonek elkar mehatxatuko dute. Geroniok alde egindakoan, Fiorillak eta Zaidak printzearekin eztabaidatuko dute: lehenengoa irainduta dago; bigarrena, berriz, minduta, printzearen jolaskeriak direla eta. Prosdocimok jakingo du Selimek maskara-dantzaldi bat baliatu nahi duela Fiorilla bahitzeko, eta Zaidari proposatuko dio Fiorilla balitz bezala jantzita agertzeko festara. Poeta afera are gehiago korapilatzeko irrikan dago, gertakari guztiak bere drama aberasteko erabili nahi baititu. Era berean, Geroniori festara mozorrotuta joatea gomendatuko dio, horrela emaztea zaindu eta bahiketa galarazi ahal izateko. Dena entzun duenez, Narcisok erabakiko du turkiar mozorrotzea eta Fiorilla bahitzea. Mozorro eta identitate faltsu horiek guztiek nahasmena eragingo dute festan: batetik, Geroniok, erotu egin delakoan, bi turkiar eta bi Fiorilla ikusi, eta bere benetako emaztea eskatuko du; bestetik, geroxeago, Fiorillak Narcisorekin ihes egingo du, eta Zaidak, ostera, Selimekin. Ostatura itzulitakoan, Prosdocimok, Selim eta Zaida berriro elkarrekin daudela jakitun, printzeak berak esanda, Geronio atsekabetuari aholkatuko dio Fiorillari dibortzioa nahi duela sinetsarazteko, emakumea zentza dadin. Hala, Fiorillak senarraren eskutitz bat jasoko du: mespretxatu eta Sorrentora, senideengana, itzultzera behartuko du; andreak, goibel, gauzak batu eta etxea utziko du. Horrenbestez, dena dago prest zorioneko amaiera jazo dadin, eta, ohi bezala, Prosdocimok emango die bide gertakariei; izan ere, dagoeneko baditu bere dramma buffoa idazteko elementu guztiak. Hala, Fiorilla benetan damuturik dagoela jakinaraziko dio Geroniori, gizona emaztearekin berriro egoteko eta hura besarkatzeko desiratzen dagoelako. Bikoteak, adiskidetuta, agur esango die Salimi eta Zaidari, eta printzea eta ijitoa ontziratu eta elkarrekin itzuliko dira beren herrialdera.