ABAO PRODUCCIONES EN OVIEDO Y VALLADOLID

ABAO Bilbao Opera bere posizionamendua indartzen ari da ibilbide liriko nazionaleko agente aktibo gisa antzoki eta denboraldi erreferenteen interesa pizten duten ekoizpen propioekin. ABAOren proposamen eszenikoak oso balioetsiak dira obren hautaketagatik, sormen-berrikuntzagatik eta elkartearen ekoizpenen katalogoa osatzen duten muntaien kalitateagatik.

Apirilean, Valladolideko Calderón antzokiak Cavalleria rusticana eta Pagliacci programatu ditu, Italiako verismoaren bi lan enblematiko, 2021ean Bilbon estreinatu ondoren orain beste etapa bat hasiko dutenak etxetik kanpo. Eszenaratzeak, Joan Anton Rechik sortuak, ia etengabeko kontakizun zinematografiko gisara planteatzen du eszena, Mediterraneoko herri batean girotua, non bi istorioak elkartu eta drama beraren ondoz ondoko kapituluak balira bezala mintzatzen diren elkarrekin. Jeloskortasunak, traizioak eta indarkeriak egituratzen dute indar emozional handiko proposamena.

Gabriele Moreschiren eszenografia zaindua, estilo klasiko eta intimistakoa, Alberto Rodríguezen argiztapenak eta Mercè Palomak diseinatutako jantziek nabarmentzen dute, elementu horiek pertsonaien sakontasun psikologikoa eta bi obretan nagusitzen den giro asaldagarria sendotzen laguntzen baitute.

Bestalde, Ópera de Oviedo fundazioak Mozarten Così fan tutte hautatu du, ABAOk 2023ko urtarrilean estreinatu zuen ekoizpena, 2026/2027 denboraldiari amaiera emateko Campoamor antzokian. Marta Eguiliorren eszenaratzeak XIX. mendearen amaierako magoen eta ilusionisten azoka ibiltarietan oinarritutako unibertsoaren bidez berrinterpretatzen du Mozarten komedia ospetsua, non engainuak, zoriak eta itxurak funtsezko zeregina betetzen duten.

Eremu eszenikoaren egitura elkarren aurkako bi munduk osatzen dute, xake-taula batek eta baso sinboliko batek, hain zuzen ere, bikote protagonisten bidaia emozionalean zehar. Betitxe Saituaren jantziek, dotorezia historiko finekoek, David Alcortaren eta Eguiliorren beraren argiztapenak, eta Iván Puñalen bideo-proiekzioek osatzen dute koherentzia eta nortasun handiko multzo bisuala.

Bilboko ekoizpenen irteera horiek, aurrekoek bezala, ABAO Bilbao Operaren nazio-mailako eta nazioarteko proiekzio-estrategia berresten dute, kalitatezko proposamen eszenikoen sorkuntzan, antzoki prestigiotsuekin lankidetzan aritzean, eta opera publiko gero eta zabalago eta askotarikoagoen artean hedatzeko konpromisoan oinarritua. Hala, denboran etengabe jorratutako bide horregatik, ABAOk erreferentea izaten jarraitzen du Espainiako panorama lirikoaren barruan eta kanpoan.