AURKEZPENA
Denboraldiari amaiera emateko, maiatzean, ABAOk Pucciniren La Bohème taularatuko du, Parisko bi artista gazteren arteko maitasun-istorio kartsu, denboragabe eta ezabaezina. Italiako errepertorio lirikoko opera eder, tragiko, hunkigarri eta konplexuenetakoa da, eta Bilboko denboraldian 28 aldiz antzeztu den ezinbesteko obra.
Istorio tragiko eta hilezkor honek hasieratik erakargarritasun indartsua sortzeko gaitasuna du, eta nazioartean gehien estimatzen eta miresten diren operen arteko bat da, baita publikoaren, diskoetxeen eta antzokien gogokoenetakoa ere. Obra honen garrantziaren eta betiereko erakargarritasunaren erakusgarri, bere ospe itzela.
Obra hau, Puccinik berak “piccole cose” erako opera gisa definitu zuena, Parisko Auzo Latinoan garatzen da, eta argumentuaren haria Mimì eta Rodolfo artista bohemio gazteen arteko maitasun-istorioa da. Miren Urbieta soprano gipuzkoarrak jostun lazgarriaren papera antzeztuko du, bere poeta maiteminduaren atsekabeei adi Celso Albelo, eta Marina Monzó sopranoa eta Manel Esteve baritonoa Musetta eta Marcello maitale asaldatuak izango dira.
Opera honen arrakastaren gakoetako bat bere orkestra-paletaren edertasun musikal handia eta eraginkortasun dramatikoa dira; izan ere, sentimenduak eta irrikak bai musika-motiboetan bai objektuetan eta giroetan islatzen dira. Pedro Halffter maisuak laguntzen dio Bilbao Orkestra Sinfonikoari narrazio sentimental honetan.
Oholtzan, Leo Nucci baritono legendarioak, orain eszena-zuzendaria ere badenak, sortutako produkzioa. Egitura tradizional, profil klasiko eta izaera errealistarekin, garaiko eszenekin eta jantziekin hornitua, eta argiztapen ausart eta eraginkorrarekin bildua, XIX. mendeko Paris tipikoa dakarkigu, Auzo Latinoa xarmaz eta xehetasun sotilez beteta berreraikita.
FITXA ARTISTIKOA
ANTZEZLEAK
- Mimí
- Rodolfo
- Marcelo
- Musetta
- Schunard
- Colline
- Bernoit/Alcindoro
- Parpignol
TALDE ARTISTIKOA
- Director Musical
- Director De Escena
- Director Repositor
- Escenografía
- Vestuario
- Iluminación
- Director Del Coro
- Orquesta
- Producción
- Coro Infantil
MULTIMEDIA
Boheme T72 v2
AUDIO
Youtube
SINOPSIA
Bohemio gazte batzuk gorputzeko hotza astintzen saiatzen ari dira Paisen bizi diren ganbara izoztuan: Rodolfo poeta, Marcello margolaria, Colline filosofoa eta Schaunard musikaria dira. Tximiniara denetik bota arren, ez dute lortzen behar bezalako sua piztea eta, ondorioz, ezin dute gela berotu. Schaunardek, zortea izanik aberats batentzat lanean aritu denez, janaria eta egurra ekarriko ditu, baina, hala ere, afaltzera kanpora joatea proposatuko die adiskideei, Auzo Latinora, hain zuzen ere, Gabon-gaua baita. Benoîtek, gazteen etxejabeak, alokairua ordain dezaten joko die atea. Gizona edatera gonbidatu eta, azkenean, etxetik botako dute, bere emazteak ezer jakin gabe dituen amodio-aferengatik lotsarazi ondoren. Momus kafetegira joango dira denak, Rodolfo izan ezik, artikulu bat bukatu behar duelako. Halako batean, kandela itzali zaiola eta, Mimì izeneko auzokoak atea joko du. Oso zurbil, konortea galduko du. Bere onera datorrenean, etxeko giltza galduko du, eta biak hasiko dira ilunpetan bilatzen. Rodolfok aurkitu egingo du, baita bere poltsikoan ezkutatu ere, Mimìrengandik hurbil egoten jarraitzeko. Labur-labur, nor diren kontatuko diote elkarri (neskaren ogibidea loreak bordatzea da), eta, elkarrenganako erakarpen eutsiezina sentitzen dutenez, Momus kafetegira elkarrekin joatea erabakiko dute, bertan Rodolforen lagunekin elkartzeko.
Auzo Latinoko kaleetan, Gabon-gauean, egundoko iskanbila dago, jendetza joan-etorri etengabean. Saltzaileak garrasika eskaintzen ari dira beren salgaiak, eta Rodolfok buruko bat erosiko dio Mimìri denda batean. Ondoren, lagunekin eseriko dira Momus kafetegi kanpoko mahai batean. Berehala, Musetta neska gazte erakargarria helduko da bere miresle Alcindoro adineko harroputzarekin. Musetta eta Marcello aspaldi maitaleak izan zirenez, gizona ez ikusiarena egiten saiatuko da, baina emakumeak haren arreta kosta ahala kosta erakartzeko ahaleginak egingo ditu; bere xarma eutsiezinari eta lizunkeria-dosi handiei esker, lortu egingo du. Azkenean, zapata batek min egiten diolako aitzakiaz, Alcindoro oinetako-pare berria erostera bidali eta uxatu egingo du. Orduan, Marcellok Musseta pozarren besarkatu eta mahai bietako kontuak batzea erabakiko du; zerbitzariari esango dio Alcindorok ordainduko dituela itzultzen denean. Bohemio gazteak alaitsu joango dira.
Otsaileko egun hotz batean, Mimì Marcelloren eta Musettaren etxean agertuko da, Parisko aduana-hesi baten ondoan dagoen ostatuan. Gizonak Rodolfo ere barruan dagoela jakinarazten dionean, neskak sartzeari uko egin eta poetaren jeloskortasuna beren harremana hondatzen ari dela kontatuko dio. Bien iritziz, agian onena banantzea litzateke. Rodolfo etxetik ateratzean, Mimí ezkutatu egingo da, baina adiskideen arteko elkarrizketa entzungo du: Rodolfok dio Mimí gero eta gaixoago eta makalago dagoela, eta lagungarriagoa ezin izatea jasangaitza egiten zaiola. Neska hor dagoela ohartutakoan, bikotekideek maitasunez besarkatuko dute elkar; Marcello, berriz, Musetta nor seduzitzen ari den ikustera joango da, barre-algaraka entzun baitu. Mimìk agur esango dio Rodolfori, baina elkarrekin jarraitzea eta udaberrian banantzea erabakiko dute. Aldi berean, Musetta eta Marcello eztabaida amaigabean murgilduta daude, elkarri irainka, ohi bezala.
Lehen ekitaldiko ganbara berean. Mimì eta Rodolfo banandu egin dira. Poeta idazten saiatzen ari da, eta Marcello margotzen, baina nork bere maitea darabil etengabe gogoan. Schaunard eta Colline jaki eskas batzuekin etorriko dira, baina, halere, aparteko oturuntza ospatzen ari direlako pantak egingo dituzte guztiek, eta dantzan hastea ere proposatuko dute. Bat-batean, Musetta ganbaran agertu, eta Mimì oso gaixo dagoela jakinaraziko die, gaixoegi eskailera guztiak igo ahal izateko. Kalean topatu du noraezean, ganbarara itzuli eta Rodolfo ondoan duela hil nahian.
Eskaileretatik jaso eta ohean sartuko dute. Harentzako botikak erosteko asmoz, bakoitzak ahal duena saltzeko aterako dira kalera. Jostunak eta poetak elkar ezagutu zuten eguna eta iraganeko zoriona oroituko dituzte. Adiskideak botikekin eta mahukatxo batekin itzuliko dira, baina beranduegi da. Denentzako esker oneko hitz goxoak esan ondoren, Mimì hil egingo da, Rodolfo etsipenean murgilduta utzirik.