SARRERAK AGORTUTA LA TRAVIATA-RAKO
ABAO Bilbao Operak sarrerak agortuta daudela jakinarazteko kartela eskegi du La traviata operaren laugarren emanaldian; hain zuzen ere, Giuseppe Verdiren maisulan horrekin inauguratu du Elkarteak bere 75. Denboraldi historikoa. Aretoa ia erabat bete duten hiru antzezpenen ondoren, azkenak osorik bete du, opera-errepertorioko funtsezko obra horrek piztutako aparteko interesa agerian utzita.
Publikoaren erantzuna babes bereziki garrantzitsua da denboraldi honetan, 75. Denboraldia eta ABAO Bilbao Operak jarduera lirikoa antolatzen daramatzan 75 urteak ospatzeko hirurtekoaren hasieran. La traviata-k, operarik maitatuenetakoak eta unibertsalenetakoak, berriro erakutsi du zer-nolako gaitasuna duen bai ohiko zaleak bai ikusle berriak hunkitzeko eta erakartzeko.
Ekoizpenak, ikusle piloa biltzeaz gain, kritika espezializatuaren goraipamena jaso du: Jessica Pratt, Javier Camarena eta Gabriele Viviani buru dituen abeslari-taldearen kalitatea, Francesco Ivan Ciamparen musika-zuzendaritza, Euskadiko Orkestraren eta Bilboko Opera Koruaren jardun bikaina, eta Mario Pontiggiak sortutako ekoizpenaren dotorezia bisuala nabarmendu ditu.
Argitaratutako iritzien artean, ekoizpena «arrakasta ukaezina» dela adierazi da, eta publikoaren erantzun bikaina eta amaierako txalo-zaparrada luzea azpimarratu dira; beste hedabide batzuen aburuz, berriz, proposamena «Traviata zoragarria» da, eta Jessica Pratten interpretazioa bereziki nabarmendu dute.
Juan Carlos Matellanes Elkarteko presidenteak adierazi duenez, «La Traviata-rako sarrerak agortuta egotea albiste izugarri ona da ABAOrentzat eta gure hiriko kulturarentzat. Babes horrek erakusten du operak zirrara, interesa eta konpromisoa eragiten jarraitzen duela publikoaren artean, eta anbizioz lan egiten jarraitzera bultzatzen gaitu, kalitate goreneko proiektu artistikoak eskaintzeko».
Elkarteak publikoaren konfiantza eta fideltasuna eskertu nahi ditu, baita artisten, babesleen eta erakunde laguntzaileen konpromisoa ere, eta oso bereziki BBVA Fundazioaren babesa, La traviata-ren emanaldien babesle esklusiboa den aldetik.
Aretoa erabat bete ondoren, La traviata azken urteetan publikoaren aldetik erantzunik onena izan duen denboraldi-hasiera bihurtu da, eta ABAO Bilbao Operak Europako opera-plaza handienetako bat izanik betetzen duen zeregina sendotu du.
