Tutto Verdi

Sari hauek garai guztietako konpositorerik apartenetako bat, Giuseppe Verdi, eta haren obra aldarrikatzeko 2006an sortu zen paregabeko proiektuaren nazioarteko proiekzioa bultzatzen dute. Programak, 16 urtean garatu denak, 30 opera, 124 emanaldi, 13 estreinaldi, produkzio berriak eta koprodukzioak ekarri ditu Bilbora, hamar «Verdi Asteak», hainbat diziplinatako 56 hizlariren parte-hartzearekin, baita liburuak, grabazioak, sariak eta aitorpenak ere.

Sariak, zortzi kategoriatan banatuak, ABAO Bilbao Opera Tutto Verdi proiektua garatzeko eta gauzatzeko ekarpen esanguratsua egin duten pertsonei eta erakundeei ematen zaizkie, omenaldia egiteko eta eskerrak emateko asmoz.

BBVA FUNDAZIOA

Bikaintasunaren bilaketan duen ezaugarri bereizgarriagatik, eta bai ezagutza zientifikoa bai kulturala sustatzeagatik. Musikaren eta operaren alde egiteagatik, Ezagutzaren Mugak sariketan berezko kategoria izanik. ABAO Bilbao Operaren eta, bereziki, Tutto Verdi proiektuaren barruko jardueretan hamazazpi urtez etenik gabe eta irmotasunez laguntzeagatik, babesle nagusi gisa.

Leo Nucci

Munduko agertokirik garrantzitsuenetan egindako ibilbide luzeagatik eta ABAO Bilbao Operaren denboraldietan egindako antzezpen beti arrakastatsuengatik, zeinen artean Tutto Verdi proiektuaren barruan 2013ko urrian eskainitako Rigoletto ahaztezina nabarmentzen den: ikusleek “Si, vendetta” bi aldiz abesteko eskatu zuten emanaldi guztietan.

Pier Luigi Pizzi

Bere ekoizpenen edertasunaren bidez operari egindako ekarpen ikaragarriagatik; izan ere, lan horiengatik gure garaiko eszena-zuzendari, eszenografo eta jantzi-diseinatzaile garrantzitsuenetakoa da. Bere sorkuntza ospetsuenetako batzuk ABAO Bilbao Operan ikusi izan dira, Tutto Verdi proiektuaren barruan eta kanpoan.

Daniela Barcelona

ABAO Bilbao Operan Tutto Verdi proiektuaren barruan ikusitako lehen Don Carlos-en Eboliko Printzesa modu ahaztezinean antzezteagatik.

Juan Jesús Rodríguez

Tutto Verdi proiektuaren barruan parte hartu duen bakoitzean izandako arrakasta nabarmenagatik eta munduko baritono verdiar garrantzitsuenetakoa izateagatik.

Riccardo Frizza

Bere moldakortasunagatik, Italiako opera-errepertorioaren eta, bereziki, Verdiren partituren azterketa eta ezagutzagatik; horregatik da, hain zuzen ere, egungo orkestra-zuzendari eskatuenetakoa.

Emilio Sagi

Bere sormen bikainagatik, sen estetikoagatik eta gizartea islatzeko gaitasunagatik, bai eta tradizioaren eta modernitatearen arteko oreka ezin hobea lortzeagatik ere, zeina Bilbon 2006an estreinatutako Rigoletto-ren ekoizpenean, gerora nazioarteko eszenatoki askotan berriz antzeztuan, ederki islatu zuen.

Bilboko Opera Korua

Azken 30 urteetan ABAO Bilbao Operarekin izandako konpromisoagatik, bera eta bere bikaintasun artistikorik gabe ezinezkoa izango zelako Tutto Verdi proiektua gauzatzea, programako opera guztietan parte hartu baitu. Eta, oso bereziki, 2022ko Tutto Verdi Kontzertuan Nabucco operako «Va, pensiero» abestuz eskainitako emanaldi bikainean.